.svg)
एमालेको चुनावी घोषणापत्र : विज्ञान पार्क, प्रविधि पार्क, नवप्रवर्तन केन्द्र स्थापना
.png)
काठमाडौं : नेकपा एमालेले आफ्नो चुनावी घोषणापत्रमा सबै किशोरीलाई निःशुल्क प्याड दिने घोषणा गरेको छ ।
यसैगरी, शिक्षकको मर्यादा राख्दै सामाजिक सुरक्षामा लैजाने र विद्यालय शिक्षा सुधारका लागि पनि विशेष योजना प्रस्तुत गरिएको छ।
घोषणापत्रमा एमालेले सामुदायिक विद्यालयका शैक्षिक पूर्वाधारमा राज्यको लगानी बढाउने, उद्यमशिलता, सामाजिक उत्तरदायित्व, नवप्रवर्तनशील सोच र राष्ट्रिय सामर्थ्य अभिवृद्धिमा योगदान गर्नसक्ने जनशक्ति निर्माण गर्ने प्रतिबद्धता जनाएको छ।
विद्यालय शिक्षालाई क्रमशः अनिवार्य र निःशुल्क बनाउने र पूर्व-प्राथमिक शिक्षासहित सबै बालबालिकाको शिक्षामा समान पहुँच सुनिश्चित गर्ने घोषणा पनि गरिएको छ।
शिक्षा प्रणालीलाई भर्ना र परीक्षा केन्द्रित मात्र नराखी राष्ट्रप्रेम, उद्यमशिलता, सामाजिक उत्तरदायित्व, नवप्रवर्तनशील सोच र राष्ट्रिय सामर्थ्य अभिवृद्धिमा योगदान गर्नसक्ने जनशक्ति निर्माण गर्ने दिशामा लैजाने योजना प्रस्तुत गरिएको छ।
व्यावहारिक, नैतिक, राष्ट्रभक्तिमूलक र डिजिटल मैत्री पाठ्यक्रम र शैक्षिक सामग्री विकास गर्न पनि एमालेले प्रतिबद्धता जनाएको छ ।
'शिक्षाको गुणस्तर सुधारका लागि शिक्षकको क्षमता, वृत्तिविकास र मर्यादा अभिवृद्धि गर्दै उच्च योग्यताका उत्कृष्ट जनशक्तिलाई शिक्षण पेसामा आकर्षित गर्नेछौं,' घोषणापत्रमा उल्लेख छ ।
विद्यालय शिक्षा ऐन र उच्च शिक्षासम्बन्धी ऐन जारी गर्ने, विश्वविद्यालयमा प्राज्ञिक स्वायत्तता कायम गर्ने र विज्ञान, प्रविधि, अनुसन्धान र नवप्रवर्तनका लागि सहकार्यमा विज्ञान पार्क, प्रविधि पार्क, नवप्रवर्तन केन्द्र र ग्रामीण नवप्रवर्तनशाला स्थापना गर्ने पनि घोषणापत्रमा उल्लेख गरिएको छ।
युवालाई स्वदेशमै रोजगारीका अवसर सिर्जना गर्ने उद्देश्यका साथ, शिक्षा-अनुसन्धान-उद्यमशिलताको सम्बन्ध सुदृढ गर्ने र नेपालको मौलिक शिक्षाको पुनर्जागरण गर्दै नेपाललाई शान्ति अध्ययन, योग, आयुर्वेद, ध्यान, मानसिक स्वास्थ्य र पूर्वीय दर्शनको अन्तर्राष्ट्रिय केन्द्रका रूपमा विकास गर्ने पनि एमालेको योजना रहेको छ।
पढ्दै कमाउँदै, कमाउँदै पढ्दै कार्यक्रममार्फत उच्च शिक्षाका लागि विदेश जाने प्रवृत्ति घटाउने र विद्यार्थी संख्या न्यून भएका सामुदायिक विद्यालयहरू गाभ्ने, शिक्षक दरबन्दी मिलान गर्ने, आवासीय व्यवस्था गर्ने तथा छात्रवृत्ति र सहुलियत कार्यक्रमलाई एकीकृत र प्रभावकारी बनाउने योजना पनि घोषणापत्रमा समावेश गरिएको छ।
नेकपा एमाले, चुनावी घोषणापत्र, किशोरी प्याड, शिक्षा सुधार, शिक्षा नीति, शिक्षक मर्यादा, युवा रोजगारी
